ឯកឧត្តម អ៊ុំ រាត្រី បានប្រាប់ឱ្យដឹងថា រដ្ឋបាលខេត្តបានរៀបចំទីតាំងមួយទៀត សម្រាប់ពលរដ្ឋទៅស្នើសុំធ្វើប័ណ្ណព្រំដែន នៅច្រកចេញ​ចូលតែមួយ​ក្នុង​ក្រុង​ប៉ោយប៉ែត ដើម្បីសម្របសម្រួលឲ្យពលរដ្ឋនៅក្រុងប៉ោយប៉ែត មិនចាំបាច់ឡើងទៅទីរួមខេត្ត

បន្ទាយមានជ័យ៖ នៅថ្ងៃទី៤ ខែឧសភា ឆ្នាំ២០២២នេះ ឯកឧត្តម អ៊ុំ រាត្រី បានប្រាប់ឱ្យដឹងថា ដើម្បីសម្រួលដល់​ការ​ធ្វើ​ឯកសារ​ធ្វើប័ណ្ណព្រំដែននេះ រដ្ឋបាលខេត្តបានបង្កើននូវកម្លាំង ប្រចាំការ​នៅច្រក​ចេញ​ចូលតែមួយ​ក្នុងសាលាខេត្ត ដើម្បីជំរុញការផលិតទទួលពាក្យបណ្ដឹង រួមទាំង​សម្រប​សម្រួល​បំពេញ​ឯកសារ។ ដើម្បីបង្កភាពងាយស្រួល ដល់ប្រជាពលរដ្ឋ អាជ្ញាធរខេត្តបន្ទាយមានជ័យ បានរៀបចំនូវទីតាំងទទួលធ្វើប័ណ្ណព្រំដែន ចំនួន២កន្លែង បន្ទាប់ពីអាជ្ញាធរនៃប្រទេសថៃ បានបើកច្រកព្រំដែនឡើងវិញ ដើម្បីឲ្យពលរដ្ឋអាចឆ្លងដែនចេញចូលកម្ពុជា-ថៃ ប៉ុន្តែត្រូវបំពេញកាតព្វកិច្ចមួយចំនួន ។ 

ឯកឧត្តម អ៊ុំ រាត្រី បានបន្តថា រដ្ឋបាលខេត្តបានរៀបចំទីតាំងមួយទៀត នៅច្រកចេញ​ចូលតែមួយ​ក្នុង​ក្រុង​ប៉ោយប៉ែត ដើម្បីសម្របសម្រួលឲ្យពលរដ្ឋនៅក្រុងប៉ោយប៉ែត មិនចាំបាច់ឡើងទៅទីរួមខេត្ត ។ លោកបានបន្ថែមថា ចាប់តាំងពីបានបើកច្រកទ្វារ​ព្រំដែន​អន្តរជាតិ​ប៉ោយប៉ែត​ឡើងវិញ គិតត្រឹមថ្ងៃទី៣ ខែឧសភា មានពលរដ្ឋទៅស្នើសុំធ្វើប័ណ្ណព្រំដែន មានប្រហែលជាង ៥០០នាក់ហើយ ៕