​នាព្រឹកថ្ងៃទី៣០ ខែមីនា ឆ្នាំ២០២២នេះ ឯកឧត្តម កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានសម្តែងការហួសចិត្តយ៉ាងខ្លាំង ចំពោះករណីយកគោយន្តដឹកគ្រឿងញៀនបន្តកន្ទុយគ្នា បម្រុងចូលមកខ្មែរ

​ ​ភ្នំពេញ៖ ​នាព្រឹកថ្ងៃទី៣០ ខែមីនា ឆ្នាំ២០២២នេះ ឯកឧត្តម កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានសម្តែងការហួសចិត្តយ៉ាងខ្លាំង ចំពោះករណីយកគោយន្តដឹកគ្រឿងញៀនបន្តកន្ទុយគ្នា បម្រុងចូលមកខ្មែរ ប៉ុន្តែត្រូវបានអាជ្ញាធរប្រទេសឡាវធ្វើការបង្រ្កាបបាន។

ថ្លែងក្នុងឱកាសអញ្ជើញ​បើក​សន្និបាត​បូកសរុបលទ្ធផលការងារ​ត្រួត​ពិនិត្យ​គ្រឿងញៀន​ឆ្នាំ២០២១ និង​លើកទិសដៅការងារឆ្នាំ២០២២​ របស់អាជ្ញាធរជាតិប្រយុទ្ធប្រឆាំងគ្រឿង នៅសណ្ឋាគារសុខាភ្នំពេញ ​ឯកឧត្តម កែ គឹមយ៉ាន បាននិយាយថា «ប៉ុន្មានថ្ងៃមុនខេត្តស្ទឹងត្រែង ​ឃើញ​មក​ពីឡាវ ​ហើយ​គោយន្ត​ពី​ដើម​គេ​យក​ដឹក​តែជី តែឥឡូវ​យកដឹកគ្រឿងញៀន​ទាំង​ការុងៗ ​ហើយការដឹកនេះ គឺជាការដឹកដោយចំហរ…។លេងតែអញ្ចឹងងាប់ដល់ខ្មែរ តែទោះជាយ៉ាងណាយើងអគុណ​ ដល់អាជ្ញាធរឡាវ ដែលចាប់​បាន​ទាន់​ពេលវេលា»។