នៅថ្ងៃច័ន្ទនេះ «គ្រោះរញ្ជួយដី» នៅប្រទេសឡាវ កើតមានឡើងរហូតដល់ទៅ២ដង

(វៀងច័ន្ទ)៖ បើតាមការចេញផ្សាយដោយ សារព័ត៌មាន Lao Times នាព្រឹកថ្ងៃចន្ទ ទី២០ ខែធ្នូ ឆ្នាំ២០២១ បានឲ្យដឹងថា គ្រោះរញ្ជួយដីកម្រិតស្រាល និងមធ្យមសរុប ២លើក បានកើតមាននៅតំបន់ភាគខាងជើងប្រទេស កាលពីពេលទាបភ្លឺថ្ងៃចន្ទនេះតែម្តង (ម៉ោងនៅទីក្រុងវៀងច័ន្ទ) ប៉ុន្តែវាមិនបានបង្កឲ្យមនុស្សណាម្នាក់រងគ្រោះថ្នាក់ ឬខូចខាតទ្រព្យសម្បត្តិអ្វីឡើយ។

គ្រោះរញ្ជួយដីខាងលើនេះ បានកើតមានឡើងនៅក្នុងខេត្ត សាយ៉ាបួរី (Xayaboury) ភាគខាងជើងប្រទេស ដោយលើកទី ១ មានកម្រិត ៣.៥រ៉ិចទ័រ បានកើតមានឡើងកាលពីវេលាម៉ោង ៤៖០២នាទី (ចេញពីក្នុងដីជម្រៅ ១០គីឡូម៉ែត្រ) និងលើកទី ២ មានកម្រិត ៥.៨រ៉ិចទ័រ (ចេញពីក្នុងដីជម្រៅ ១០គីឡូម៉ែត្រដូចគ្នា)។ ដោយសារតែគ្រោះរញ្ជួយដីខាងលើនេះ បានវាយប្រហារចំតំបន់ដែលគ្មានមនុស្សរស់នៅច្រើន ដូច្នេះវាពុំបានបង្កគ្រោះថ្នាក់ ឬការខូចខាតអ្វីនោះឡើយ៕

Leave a Reply

Your email address will not be published.