(ម៉ិកស៊ិក)៖ លោក Andres Manuel Lopez Obrador ប្រធានាធិបតីម៉ិកស៊ិក បាននិយាយថា រដ្ឋាភិបាលសហរដ្ឋអាមេរិកកំពុងព្យាយាមគ្រប់គ្រងនៅតាមព្រំដែនភាគខាងត្បូងរបស់ខ្លួន ដោយស្ដីបន្ទោសថាខ្វះការគ្រប់គ្រង បន្ទាប់ពីមានជនអន្តោប្រវេសន៍ជាង ៥០នាក់ស្លាប់ ខណៈកំពុងត្រូវបានរត់ពន្ធចូលទៅក្នុងទឹកដីសហរដ្ឋអាមេរិក។
ថ្លែងអំឡុងសន្និសីទសារព័ត៌មានកាលពីថ្ងៃអង្គារ មួយថ្ងៃបន្ទាប់ពីជនអន្តោប្រវេសន៍រាប់សិបនាក់ត្រូវបានរកឃើញស្លាប់ នៅក្នុងរថយន្តដឹកទំនិញបិទជិតមួយគ្រឿងក្បែរទីក្រុង San Antonio រដ្ឋ Texas លោក Obrador និយាយថា ការស្លាប់ទាំងនោះគឺជាសោកនាដកម្មដ៏ធំបំផុត ដោយបន្ថែមថា ឧបទ្ទវហេតុបែបនេះកើតឡើងដោយសារភាពក្រីក្រ និងការអស់សង្ឃឹម ព្រមទាំងភាពចលាចលនៅតាមព្រំដែន។
លោកប្រធានាធិបតីនិយាយថា ឧបទ្ទវហេតុនេះកើតឡើងដោយសារមានចលនារត់ពន្ធមនុស្ស និងខ្វះការគ្រប់គ្រង ជាក់ស្ដែងដូចជាករណីនៅព្រំដែនម៉ិកស៊ិក-សហរដ្ឋអាមេរិក ប៉ុន្តែក៏មាននៅក្នុងទឹកដីអាមេរិកផងដែរ។ ក្រុមមន្ត្រីអនុវត្តន៍ច្បាប់អាមេរិកបានប្រាប់សារព័ត៌មាន CBS ថា ឧបទ្ទវហេតុនេះទំនងជាករណីរត់ពន្ធមនុស្សដ៏ធំបំផុតក្នុងប្រវត្តិសាស្ត្រសម័យទំនើបរបស់អាមេរិក បន្ទាប់ពីក្រុមអាជ្ញាធរក្នុងតំបន់នៅរដ្ឋ Texas បានបង្កើនតួលេខចំនួនអ្នកស្លាប់ដល់ ៥១នាក់កាលពីរសៀលថ្ងៃអង្គារ។
គេមិនច្បាស់ទេថា តើក្រុមជនរងគ្រោះទាំងនោះនៅក្នុងរថយន្តនោះយូរប៉ុណ្ណា តែនគរបាលនិយាយថា ពុំមានឃើញទឹក ឬបើកម៉ាស៊ីនត្រជាក់នៅក្នុងរថយន្តនោះទេ ទោះបីជាសីតុណ្ហភាពរដូវក្ដៅឡើងខ្ពស់ក៏ដោយ។ ទោះជាជនរងគ្រោះទាំងអស់នោះនៅមិនទាន់អាចបញ្ជាក់អត្តសញ្ញាណបាន តែបុរសចំនួន ៣៩នាក់ និងស្ត្រី ១២នាក់ស្ថិតក្នុងចំណោមអ្នកស្លាប់ទាំងនោះ រួមទាំងជនអន្តោប្រវេសន៍មកពីម៉ិកស៊ិក ហុងឌូរ៉ាស់ និងហ្គាតេម៉ាឡា៕