អ៊ុយក្រែន៖ កាលពីថ្ងៃព្រហស្បតិ៍ម្សិលមិញ រដ្ឋមន្ត្រីការបរទេសអ៊ុយក្រែនបាននិយាយថា ទីក្រុង Kyiv នៅតែត្រៀមខ្លួនជាស្រេចសម្រាប់ទំនាក់ទំនងផ្នែកការទូតជាមួយប្រទេសរុស្ស៊ី ប៉ុន្តែអ៊ុយក្រែននឹងមិនទទួលយកឱសានវាទឡើយ។ លោកបាននិយាយថា ការងាររបស់លោកគឺធ្វើឱ្យប្រាកដថា យើងស្ដារឡើងវិញបូរណភាពទឹកដីរបស់យើង យើងការពារដែនអធិបតេយ្យភាព ហើយលោកបាននិយាយថា ការអះអាង និងឱសានវាទទាំងអស់ដែលដាក់ចេញដោយរុស្ស៊ីគឺខុសច្បាប់ យើងមិនអាចទទួលយកបាននោះទេ។
លោករដ្ឋមន្ត្រីការបរទេសអ៊ុយក្រែន បានបញ្ចាក់ថា លោកមិនដឹងអំពីទណ្ឌកម្មណាមួយ ដែលនឹងហាមឃាត់ការនាំចេញរបស់អ៊ុយក្រែន ឬកំណត់ការនាំចេញផលិតផលកសិកម្មរបស់អ៊ុយក្រែន ឬការនាំចេញផលិតផលកសិកម្មរបស់រុស្ស៊ីនោះទេ។ លោករដ្ឋមន្ត្រី បានបន្ថែមថា យោធារុស្ស៊ីបានរារាំងអ៊ុយក្រែនមិនឲ្យចូលទៅកាន់កំពង់ផែរបស់ខ្លួននៅសមុទ្រខ្មៅ ដោយទុកឱ្យប្រទេសនេះជាប់គាំង ហើយមិនអាចនាំចេញផលិត ផលស្បៀងអាហាររបស់ខ្លួនទៅកាន់ទីផ្សារអន្តរជាតិបាន៕