បាត់ដំបង ៖ បញ្ជូនជនសង្ស័យ ពីរនាក់ ទៅសាលាដំបូង ខេត្តបាត់ដំបង កាលពីថ្ងៃអង្គារ ខែឧសភា ឆ្នាំ២០២២ម្សិលមិញ ពាក់ព័ន្ធនឹងករណី យកម៉ូតូមិត្តភក្តិទៅបញ្ចាំ និងម្នាក់ទៀត ទទួលផលចោរកម្ម ។
នាយការិយាល័យនគរបាលព្រហ្មទណ្ឌ កម្រិតស្រាល នៃស្នងការដ្ឋានខេត្តបាត់ដំបង លោក វរសេនីយ៍ឯក ឈឿង គឹមសុង បានប្រាប់ឱ្យដឹងថា បន្ទាប់ពីបានទទួលពាក្យបណ្តឹងពីជនរងគ្រោះ ករណីមិត្តភក្តិខ្ចីម៉ូតូយកទៅបញ្ចាំ កម្លាំងនគរបាលជំនាញ បានចុះស្រាវជ្រាវ រហូតបានកំណត់មុខសញ្ញា ដែលជនសង្ស័យបានយកម៉ូតូរបស់ជនរងគ្រោះ ទៅដាក់បញ្ចាំ នៅហាងបញ្ចាំមួយកន្លែង ដែលម្ចាស់ហាង បានទទួលយកម៉ូតូបញ្ចាំ ពីជនសង្ស័យដោយគ្មានឯកសារច្បាស់លាស់ នឹងបានរកឃើញ ទាំងម៉ូតូដែលជាប់ពាក់ព័ន្ធ ចំនួន ៨ គ្រឿងផ្សេងទៀតផងដែរ។
លោក វរសេនីយ៍ឯក បានបន្តថា ជនសង្ស័យទាំថពីនាក់រួមមានឈ្មោះ ទី១៖ឈ្មោះ ប៉េ សីហា ភេទប្រុស អាយុ ៣៨ ឆ្នាំ មានទីលំនៅ ភូមិរំចេក៤ សង្កាត់រតនៈ (អ្នកយកម៉ូតូមិត្តភក្តិ ទៅដាក់បញ្ចាំ) ទី២៖ឈ្មោះ អ៊ូច សារ៉ន ភេទប្រុស អាយុ ៥៣ ឆ្នាំ មានទីលំនៅ ភូមិសំរោងក្នុង ឃុំសំរោងក្នុង ស្រុកឯកភ្នំ ខេត្តបាត់ដំបង (អ្នកទទួលបញ្ចាំ )។ សមត្ថកិច្ច ដកហូតវត្ថុតាងបាន រួមមាន៖ ម៉ូតូម៉ាកហុងដា ឌ្រីម ចំនួន ៦ គ្រឿង និងម៉ូតូហុងដា ស្កុបពី ចំនួន ៣ គ្រឿង ។
សូមបញ្ចាក់ថា ម៉ូតូម៉ាកហុងដា ឌ្រីម ស៊េរីឆ្នាំ២០១០ មួយគ្រឿងពាក់ស្លាកលេខ បន្ទាយមានជ័យ ១C-៦៩៣៨ សមត្ថកិច្ចបាន ប្រគល់ជូនជនរងគ្រោះ ជាម្ចាស់ដើមវិញផងដែរ ចំណែកវត្ថុតាង ម៉ូតូផ្សេងទៀត ត្រូវបានសមត្ថកិច្ច រក្សាទុកជាបណ្តោះអាសន្ន រង់ចាំស្រាវជ្រាវរកម្ចាស់ដើម មកទទួល៕