ទួរគី៖ លោក Vladimir Medinsky បាននិយាយថា អ៊ុយក្រែនគួរតែប្រកាសខ្លួនជារដ្ឋអព្យាក្រឹត ស្ថិតក្រោមការធានាពីច្បាប់អន្តរជាតិដើម្បីអនុវត្តស្ថានភាពគ្មាននុយក្លេអ៊ែរ។
បន្ទាប់ពីកិច្ចចរចាជុំថ្មីមួយផ្សេងទៀតរវាងរុស្ស៊ី និងអ៊ុយក្រែននៅទីក្រុងអ៊ីស្តង់ប៊ុល ប្រទេសទួរគី ហើយហាក់ដូចជាមានសម្បទានសំខាន់ដំបូងដែលរុស្ស៊ីបានធ្វើ ចាប់តាំងពីការចាប់ផ្តើមការវាយលុកលើអ៊ុយក្រែនរយៈពេលជាងមួយខែមកនេះ។ លោកនិយាយថា គួរតែមានបញ្ជីនៃរដ្ឋអ្នកធានាដែលនឹងធានាសន្តិសុខរបស់អ៊ុយក្រែន មិនអនុវត្តចំពោះដែនដីតំបន់គ្រីមៀ និង Sevastopol។
លោក Medinsky បានបន្តថា មានការរំពឹងទុកសម្រាប់អ៊ុយក្រែនក្នុងការបោះបង់ចោល ការចូលរួមក្នុងសហព័ន្ធយោធា ការដាក់ពង្រាយមូលដ្ឋានយោធា ឬធ្វើសមយុទ្ធយោធានៅលើទឹកដីនៃអ៊ុយក្រែន ដោយគ្មានកិច្ចព្រមព្រៀងពីរដ្ឋអ្នកធានារួមទាំងសហព័ន្ធរុស្ស៊ី។ ជាមួយគ្នានេះ ប្រទេសអ៊ុយក្រែនបានស្នើសុំឱ្យមានការសម្រេចចុងក្រោយ រវាងប្រទេសទាំងពីរដើម្បីឲ្យមានជំនួបជាផ្លូវការនៃប្រមុខរដ្ឋ៕