(ម៉ូស្គូ)៖ បើតាមការចេញផ្សាយ ដោយសារព័ត៌មាន Sputnik នៅថ្ងៃអង្គារ ទី១ ខែមីនា ឆ្នាំ២០២២នេះ លោក (Sergei Shoigu) រដ្ឋមន្ត្រីការពារជាតិរុស្ស៊ី បានបញ្ជាក់ថាប្រតិបត្តិការយោធានៅអ៊ុយក្រែន នឹងមិនបញ្ចប់ឡើយ រហូតទាល់តែ ទីក្រុងម៉ូស្គូបានសម្រេចគោលបំណងសិន។
លោក Sergei Shoigu បាននិយាយថា គោលបំណងធំៗរបស់រុស្ស៊ី នោះគឺការពារប្រទេសជាតិ ពីការគំរាមកំហែងពីសំណាក់លោកខាងលិច និងធ្វើវិយោធកម្ម ឬការរំដោះអ៊ុយក្រែនចេញពីរបបយោធា។ នៅក្នុងសន្និសីទសារព័ត៌មានខ្លីមួយ នៅថ្ងៃអង្គារនេះ លោក Sergei Shoigu បន្ថែមទៀតថាយោធារុស្ស៊ីមិនមែនកំពុងចង់ត្រួតត្រាទឹកដីអ៊ុយក្រែននោះទេ តែពួកគេកំពុងធ្វើអ្វីតាមដែលអាចធ្វើទៅបានដើម្បីការពារអាយុជីវិត ជនស៊ីវិល ក្នុងនោះរួមមានទាំងការដាក់កំហិតលើការវាយប្រហារតាមផ្លូវអាកាស ពោលគឺការវាយប្រហារទាំងអស់អោយតែទីតាំងយោធា៕