(ម៉ូស្គូ)៖ ទីក្រុងម៉ូស្គូ បានព្រមានធ្ងន់ៗចំពោះហ្វាំងឡង់ហើយនិងស៊ុយអែត ប្រសិនបើប្រទេសទាំងពីរ ហ៊ានព្យាយាមចូលជាសមាជិករបស់អង្គការ NATO។ បើតាមការចេញផ្សាយដោយ សារព័ត៌មាន Fox News នៅថ្ងៃសៅរ៍ ទី២៦ ខែកុម្ភៈ ឆ្នាំ២០២២នេះ។
អ្នកនាំពាក្យក្រសួងការបរទេសរុស្ស៉ី លោកស្រី ម៉ារៀរ ហ្សាការ៉ូវ៉ា (Maria Zakharova) បាននិយាយថា «ហ្វាំងឡង់និងស៊ុយអែត មិនគួរដើម្បីតែសន្តិសុខផ្ទាល់ខ្លួនរបស់ពួកគេ ធ្វើឱ្យប៉ះពាល់ដល់សន្តិសុខរបស់ប្រទេសដទៃទៀតនោះឡើយ ហើយការចូលជាសមាជិកនៃអង្គការ NATO អាចនឹងធ្វើឱ្យប្រទេសទាំងពីរ ត្រូវប្រឈមមុខនឹងផលវិបាកធ្ងន់ធ្ងរ ទាំងតាមផ្នែកនយោបាយនិងយោធា»។ ការព្រមានខាងលើនេះបានកើតមានឡើង ស្របពេលដែលរុស្ស៉ីកំពុងបន្តប្រតិបត្តិការយោធាខ្លួននៅអ៊ុយក្រែន ដោយកងទ័ពរុស្ស៉ីកំពុងបន្តរុលទៅកាន់រដ្ឋធានីកៀវរបស់អ៊ុយក្រែន។
សូមបញ្ចាក់ថា អង្គការ NATO មិនបានចូលពាក់ព័ន្ធក្នុងសង្រ្គាម ដែលកំពុងផ្ទុះឡើងនៅអ៊ុយក្រែនឡើយ ហើយក៏មិនបានបញ្ជូនទ័ពឱ្យទៅជួយការពារអ៊ុយក្រែនដែរ។ ប៉ុន្តែប្រធានាធិបតីអាមេរិក លោក ចូ បៃដិន បាននិយាយថា សហរដ្ឋអាមេរិកនឹងចូលពាក់ព័ន្ធភ្លាមៗ ប្រសិនបើរុស្ស៉ីហ៊ានប៉ះប្រទេសជាសមាជិក NATO៕