(បាងកកប៉ុស្តិ៍)៖កាលពីថ្ងៃពុធទី១៩មករា សមត្ថកិច្ចថៃដេញតាមរថយន្តសង្ស័យ ចាប់បានអ្នកដឹក ថ្នាំញៀនម្នាក់និងថ្នាំញៀនប្រភេទមេតំហ្វេតាមីនចំនួន៦,៦លានគ្រាប់ នៅក្នុងស្រុកមួយក្នុងខេត្តឈៀងម៉ៃជាប់ព្រំដែនខាងជើង។
មេបញ្ជាការ បានអោយដឹងថា នៅម៉ោងជាង២រំលងអធ្រាតរថយន្តISUZU MU-X មួយបានបើកកាត់ចំណុចត្រួតពិនិត្យរបស់យោធា ដោយមិនស្តាប់ការបញ្ជាអោយឈប់ឆែកឆេរ។ទាហានប្រចាំការនៅទីនោះបានបើករថយន្តដេញតាមនិងឃាត់រថយន្តនៅក្នុងភូមិមួយ។ ក្រោយការឆែកឆេរ សមត្ថកិច្ចថៃបានរកឃើញថ្នាំញៀន៣៣បាវ សរុបថ្នាំមេតំហ្វេតាមីន៦,៦លានគ្រាប់នៅក្នុងរថយន្ត។ ជនសង្ស័យដែលត្រូវបានឃាត់ខ្លួន មានអាយុ២៨ឆ្នាំ មកពីខេត្តស៊ីងប៊ូរី(Sing Buri)។
ការចាប់បានថ្នាំញៀនដ៏ច្រើនសន្ធឹកនេះមកពីមានព័ត៌មានស៊ើបការណ៍របស់បណ្តាទីភ្នាក់ងារបង្ក្រាបថ្នាំញៀននៅភាគខាងជើង។នេះបើតាមការអះអាង របស់លោកមេបញ្ជាការ៕