(ភ្នំពេញ)៖ តាមរយៈសេចក្តីសម្រេចដែល ទទួលបាននៅថ្ងៃទី១២ ខែមករា ឆ្នាំ២០២២ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចដកហូតមុខតំណែងលោកវរសេនីយ៍ត្រី ហួត សីហា ពីនាយប៉ុស្តិ៍នគរបាលរដ្ឋបាលសំរោងធំ នៃអធិការដ្ឋាននគរបាលស្រុកកៀនស្វាយ នៃស្នងការដ្ឋានគរបាលខេត្តកណ្តាល។
សម្តេចក្រឡាហោម ស ខេង បានឱ្យដឹងទៀតថា ក្រៅពីដកតំណែងពីនាយប៉ុស្តិ៍នគរបាលរដ្ឋបាលសំរោងធំ សម្តេចក្រឡាហោម ក៏សម្រេចបន្ថយស័ក្តិមន្រ្តីនគរបាលរូបនេះ ឲ្យមកត្រឹមអនុសេនីយ៍ឯកផងដែរ។ ការដកហូតតំណែង និងការបន្ថយស័ក្តិនាយនគរបាលប៉ុស្តិ៍រូបនេះ មិនទាន់បានបញ្ជាក់មូលហេតុ បានត្រឹមដាក់ថា «ល្មើសវិន័យកងកម្លាំងនគរបាលជាតិនោះ» ប៉ុន្តែបើតាមសេចក្តីរាយការណ៍ខ្លះៗមួយចំនួន បានឲ្យដឹងថា ការដកតំណែងនេះសង្ស័យពាក់ព័ន្ធការចាប់យុវជន៣នាក់ រឿងគ្រឿងញៀនដោយជំរិតទារប្រាក់ចំនួន៣,៥០០ដុល្លារជាថ្នូរនឹងការដោះលែង៕