ខេត្តបន្ទាយមានជ័យ ៖ សមត្ថកិច្ចសន្និដ្ឋានថា ជាការបើកបរដោយខ្វះការប្រុងប្រយ័ត្ន និងប្រើប្រាស់ល្បឿនលឿន របស់អ្នកបើកបររថយន្តដែលបង្កគ្រោះថ្នាក់ ដោយបុកគ្នាជាបន្តបន្ទាប់ គឺរថយន្តបុកម៉ូតូ និងបន្តទៅបុកគោយន្តកន្ត្រៃ បង្កឲ្យមនុស្សស្លាប់២នាក់ ភ្លាមៗនៅនឹងកន្លែងកើតហេតុ និងមនុស្ស៧នាក់ ទទួលរងរបួសធ្ងន់។
ហេតុការណ៍គញរោះថ្នាក់ដ៏គួរអោយរន្ធត់នេះ កើតឡើងកាលពីយប់ថ្ងៃទី៧ ខែកញ្ញា ឆ្នាំ២០២១ នៅលើកំណាត់ផ្លូវជាតិលេខ៦ ក្រៅទីប្រជុំជន ខាងកើតស្ពានអូរឬស្សីស្ថិតក្នុងភូមិសាស្ត្រ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។
លោកវរសេនីយ៍ឯក មាស ប្ញទ្ធី អធិការនគរបាល ស្រុកព្រះនេត្រព្រះ បានឲ្យដឹងថា ៖ មុនពេលកើតហេតុនោះមានរថយន្ត១គ្រឿងម៉ាកតូយ៉ូតា ហាយឡែនឌ័រ ពណ៌ស ពាក់ផ្លាកលេខ ភ្នំពេញ 2AN-5046 អ្នកបើកមាន ឈ្មោះ ណែ ពុំ អាយុ៥១ឆ្នាំ នៅភូមិប៉ោយតាប៉ែន ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យបានបើកពីកើតទៅលិច។ លុះបើកដល់ចំណុចកើតហេតុនោះស្រាប់តែបើកទៅបុកពេញទំហឹងពីក្រោយម៉ូតូ១គ្រឿង ពណ៌ខ្មៅ គ្មានស្លាកលេខ អ្នកបើកមាន ឈ្មោះ សឿន តុលា អាយុ៣៨ឆ្នាំ នៅភូមិទ្រយោងឃុំភ្នំលៀប ស្រុកព្រះនេត្រព្រះខេត្ត បន្ទាយមានជ័យ បណ្តាលឲ្យរបួសជើងឆ្វេងធ្ងន់។
បន្ទាប់ពីបុកហើយ រថយន្តមិនព្រមឈប់ទេ ដោយបន្ថែមល្បឿនបើករត់គេចខ្លួន ក៏បន្តទៅបុកជាមួយគោយន្តកន្ត្រៃ១គ្រឿងទៀត ដែលបើកបរក្នុងទិសផ្ទុយគ្នា។
ដោយបណ្តាលអោយ អ្នកបើកគោយន្ត និងអ្នករួមដំណើរ ស្លាប់២នាក់នៅនឹងកន្លែងកើតហេតុ ចំណែកកូនប្រុសអាយុ១២ឆ្នាំ របួសធ្ងន់។
ក្នុងគ្រោះថ្នាក់នេះ អ្នកបើកបររថយន្តនិងអ្នករួមដំណើរសរុប៥នាក់ក៏ត្រួវរងរបួសធ្ងន់ ពោលគឺអ្នករបួសសរុបចំនួនធ្ងន់៧នាក់។
អ្នករងរបួសធ្ងន់ត្រូវបានបញ្ជូនទៅសង្គ្រោះព្យាបាលនៅមន្ទីរពេទ្យនាខេត្តបាត់ដំបងនិងមន្ទីរពេទ្យខេត្តមិត្ត ភាព កម្ពុជា-ជប៉ុន មង្គលបូរីខេត្តបន្ទាយមានជ័យ។ ទាំងគោយន្តនិងរថយន្តត្រូវនគរបាលជំនាញយកមករក្សាទុកនៅអធិ ការដ្ឋាននគរបាលស្រុក ដើម្បីរងចាំធ្វើការដោះស្រាយ៕
